Day: 18.02.2019

3.2 դասարանի սովորողների հետ միասին այցելեցինք Ագարակ, որտեղ
հաճելի անկնկալ այցով մեզ միացավ նաև Տիար Ա. Բլեյանը : Ագարակում սովորողները բաժանվեցին խմբերի՝ մի խումբը զբաղվեց փայտաշինությամբ՝ փայտից պատրաստեցին գեղեցիկ աթոռներ, որոնք փոքրիկ կոճղերի էին հիշեցնում, մյուս խումբը կերակրեց կենդանիներին՝ ձիերին՝ Ճուտոյին, Գերարդին, Խզբզին (իր ծնողների անվան առաջին տառերից ստացել են ձիուկի յուրօրինակ անունը), Ջեննիին,Մաշային և ավանակ Ալբային: Սովորողները տեսան կենդանիների՝ այս տարվա առաջին անգամ դուրս գալը, վազքը, խաղը: Ուշագրավ էր ձիերի առաջնորդի Ջենիի կերակրվելը՝ որպես առաջնորդ թույլ չէր տալիս մյուս կենդանիներին մոտենալ և սնվել,միայն մարզիչի հրահանգից հետո, ի զարմանս բոլորիս, Ջենին թույլ տվեց, որ մյուսներն էլ կերակրվեն: Այնուհետև շրջեցինք Ագարակում, տեսանք նաև մյուս կենդանիներին:

Դավիթ Չալիկյանի հետ սովորեցինք Աա և Սս տառերով սկսվող բառեր, կարմիր գույնով ներկեցինք Աա տառը, կապաույտ գույնով՝ Սս տառը, որ ավելի հեշտ լինի տարբերել տառերը միմյանցից, ինչպես նաև բառերի մեջ: Տարբեր բառերի մեջ ևս առանձնացրեցինք և համապատասխան գույներով ներկեցինք տառերը՝ հաշվելով մասնիկները, մտապահելով բառերը:

Վարազդատ Մահամի հետ ավարտեցինք առաջին առաջադրանքը՝ միասին գրեցինք տրված բառերի հատկանիշ ցույց տվող բառերը, որից հետո գրեցինք տրված բառերի հատկանիշները՝ ընդ որում բառերի մեջ կային հատկանիշ ցույց տվող բառեր՝ ածականներ, այս դեպքում գրեցինք համապատասխան բառեր՝ ուշադրություն դարձնելով ուղղագրությանը, միաժամանակ հարստացնելով բառապաշարը, նոր բառեր սովորելով: