Ամենից լավ տունը 

Էնտեղ, ուր հովը խաղում է ազատ

Ու ջուրն աղմկում, անվերջ փրփրում,

Էնտեղ իր բարի, իր սիրող մոր հետ

Մի շատ անհանգիստ տղա էր ապրում,

Մի գորշ խրճիթում,

Մի հին խրճիթում,

Գետի եզերքին,

Ծառերի տակին։

Մի օր էլ եկավ անհանգիստ տղան,
Կանգնեց իր բարի, իր սիրող մոր դեմ.

«Մայրիկ, էստեղից պետք է հեռանամ.

Միակ ձանձրալի տեղը, որ գիտեմ,

Էս գորշ խրճիթն է,

Էս հին խրճիթն է,

Գետի եզերքին, Ծառերի տակին։

՛՛՛՛՛   ՛՛՛՛՛՛  ՛՛՛՛՛

Թո՛ղ գնամ շրջեմ աշխարհից աշխարհ,

Ճամփորդեմ լավ-լավ տներ տեսնելու,

Ամենից լավը ընտրեմ մեզ համար,

Գամ քեզ էլ առնեմ ու փախչենք հեռու

Էս գորշ խըրճիթից,

Էս հին խըրճիթից,

Գետի եզերքին,

Ծառերի տակին»։

՛՛՛՛՛՛        ՛՛՛՛՛՛՛՛՛՛      ՛՛՛՛՛՛՛՛՛՛
Ու գնաց, երկար թափառեց տղան,

Մեծ ու հոյակապ շատ տներ տեսավ,

Բայց միշտ, ամեն տեղ պակաս Էր մի բան…

Ու հառաչելով ետ վերադարձավ

Էն գորշ խըրճիթը,

Էն հին խըրճիթը,

Գետի եզերքին,

Ծառերի տակին։

՛՛՛՛  ՛՛՛՛՛՛  ՛՛՛՛

«Գտա՞ր, զավա՛կս», հարցրեց մայրը,

Ուրախ, նայելով իր տղի վրա։
«Ման եկա, մայրի՛կ, աշխարհից աշխարհ,

Ամենից սիրուն, լավ տունը, որ կա,

Էս գորշ խրճիթն է,

Էս հին խրճիթն Է,

Գետի եզերքին,

Ծառերի տակին»։

Առաջադրանքներ
1.Բնութագրի՛ր բանաստեղծության տղային, մորը:

2.Ի՞նչ երազանք ուներ տղան:

3.Նկարագրի՛ր տղայի խրճիթը:

4.Պատմի՛ր քո երազանքի մասին. արդյո՞ք սիրում ես քո տունը, կուզեի՞ր ուրիշ տուն գտնել քեզ համար:

5.Առաջադրանքները կատարի՛ր, բանաստեղծությունն ու առաջադրանքները տեղադրի՛ր բլոգումդ: